طريقتي للمتاجرة على الأخبار
شوف يا غالي ..
افترضنا مثلاً ان الخبر على الدولار و عاملين حسابنا اننا هندخل على الزوج دا ( دولار ين ) ..
الخطوات كالتالي :-
1- بضع أوامر معلقة قبل صدور نتيحة الخبر بدقيتين Buy Stop و Sell Stop
2- الأوامر بتكون بعيدة عن السعر الحالي بـ 15 نقطه .
مثال سعر زوج الدولار ين قبل الخبر بدقيتين كان 100.30 ..
بعمل أمر شراء معلق Buy Stop عند 100.45 ، و أمر بيع معلق عند 100.15 ..
3- بنتظر نتيجة الخبر لو جائت إيجابية على الدولار فدا معناه أن الزوج هيرتفع لذلك ع طول بكنسل أمر البيع اللي أنا عامله ..
لسبب ان ممكن يكون فيه ارتداد و يتفعل الامر و كأنك يا أبو زيد ما غزيت .
4- لو الخبر قوي زي مثلاً خبر البطالة و معروف أنه هيعمل رالي بعمل استوب لوز بـ 20 نقطه و بسيب التيك بروفيت مفتوح و بفعل التريلينج استوب بـ 15 نقطه ..
بمعني ان لو السعر تحرك 15 نقطه الستوب لوز اللي انا عاملة هيتحرك من مكانه 15 نقطة .. و هكذا
5- أما لو الخبر معروف ان حركته بتكون مثلاً 50 او 60 نقطه فبعمل التيك بروفيت بتاعي زي ما انا عايز 20 او 30 او 40 نقطة ..
6- و الخبر شغال ممكن حضرتك تعزز و تفتح أوامر جديدة بعقود صغيرة ، بمعني ان الخبر مثلاً جه ايجابي و تفعل أمر الشراء اللي انا عاملة عند 100.45 و وصل دلوقتي مثلاً عند 100.80 و لسه الزوج في ارتفاع بفتح عقود تعزيز شراء
و نصيحة وقت الأخبار عقودك تكون صغيرة و ربنا يرزقنا و يرزقك أي استفسار انا حاضر ..
و مبارك عليك الشهر ..