فيما يخص موضوع الدولار و السوق السوداء , الموضوع دة حصل ايام مبارك المخلوع كان ايامها الدولارقرب من ال5 جنيه على ما اتذكر و حصل نفس السيناريو في عدم وجود عمله في البنوك و ارتفاع السعر في السوق السودا تعالي نشوف الفرق :
في عهد حكومه مبارك الفاسدين ظهرت المشكله بدون ازمات جانبيه زي السولار و الغاز و الاكل و الشرب و البلاوي اللي بنشوفها دلوقتي كل يوم و كل ساعه , المهم استمرت الازمه لمدة شهرين تقريبا و كان فيه سوق سودا بس الفرق ان السعر برة باقصي افترا في الدنيا كان 10 قروش فرق ( كنت ساعتها بشتغل في ادارة استيراد في شركه خاصه ) و دة سبب اني حضرت الازمه ديه , الظريف ان الحكومه حطت قيود على البنوك بردو انما مش بالمنظر دة يعني التحويلات كانت بتحتاج مستندات اضافيه معقدة شويه او من خلال اعتمادات مستنديه لضمان عدم هروب التحويلات ديه للخارج و ساعتها بيوفر البنك العمله خصوصا اما تبقي خامات داخله في التصنيع عشان عجله الانتاج متتوفقش اما عن القضاء علي السوق السوداء فقد تم ضخ العمله من قبل البنك المركزي لتوفير العمله و القرار دة حصل تزامنا مع بدايه وجود شكوي بان اسعار المنتجات عموما بتغلي و طبعا القرار قضي على السوق السوداء تدريجيا لعدم الحاجه للعمله من برة و كمان الناس اتقبلت الزيادات دون ان تشعر او طبعا كما تعودنا في النظام السابق ماتش كورة جامد و خلص الكلام
اما دلوقتي مع الحكومه الظريفه اللطيفه و اللي بقت دمها تقيل على قلب كل مصري ماعدي رئيسها فما شاء الله الحلول العجيبه و المفاجئات اللي كل مرة بتخلينا على راي الاعلان نندهش ( راحت عليك يا سوسو ) , للاسف الفقر السياسي و الاقتصادي اللي بيعانوا منه و الله حتي الاجتماعي بالكتير اخر حاجه ممكن يحلوها المشكله اللي بين ام حمادة و جارتها و الحل ان ام حمادة تلغم نفسها و تحضن جارتها زي بالضبط كدة ان البنت و الست اما طلعوا هما السبب نفسهم في التحرش اللي بيتعرضوا له , فارجع تاني للموضوع فيحصل اللي مش موجود في العالم ان فرق السوق السودا يوصل ل60 قرش و جنيه فرق , و طبعا حل البنك المركزي دة مينفعش دلوقتي مثلا لاننا دوله علي وشك الافلاس , واقفين في اشارة مرور مستنين اي مساعدة , و يقولك اصل احنا بنبحث تحجيم السوق السودا طب و النبي هتقضي عليها ازاي , بالبلدي كدة فيه مخلوق معاه دولار فيه جيبه دلوقتي يروح يديه للبنك ب6.80 و الا يبيعه برة ب 7 او 7.5 جم ؟؟ لا تلاقي نفسك بتسحب دولار من حسابك اللي هيه اصلا فلوسك و البنك يقولك عايزها ليه !!!!
حسبي الله و نعم الوكيل زمان كنا بنقول فيه ظلم و العيشه صعبه بس كانت ابسط حقوقنا اننا نعيش في امان و كنا اهو في شبه امان طالما جنب الحيط , اما دلوقتي بقت اصعب و اظلم و بدون كمان امان حتي لو مستخبي جوة الحيط
نفسي مرة الرئيس الفاضل محمد مرسي ينسي انه من الاخوان و يفكر انه كان من الشعب دة و بيعاني من نفس معاناته, نفسي الاخوان نفسهم يفتكروا اتظلموا اد ايه و كانت نهايه اللي ظلم ايه و مش علي ايديهم انما على يد شباب مصر كلهم فياخدوا عبرة انها لا تدوم لاحد , الدوام لله وحده , فكروا في الشعب اللي بيعاني دة في كل قرار خاطئ و في كل كلمه بيروح فيها ارواح و كل تصرف بيخسر البلد ديه سمعتها و كرامتها
لك الله يا مصر