بسم الله الرحمن الرحيم
أخوانى الكرام انا يمكن منزلتش المظارهات لسببين
أولا شغلى عشان و ده ممكن تقولوا انه تقصير منى
ثانيا لما حصل حظر التجول كنا بنقف كلنا بالليل عشان نحرس الشوارع و البيوت
و ده حسسنى انى لى دور فى اللى حصل
و ساعتها حسيت انى فعلا اشتركت فى التغيير و فى الثورة
و اللى اتغير فى حاجات كتير
منها على الأقل انى بكتبلكم دلوقتى
يعنى لو من شهرين الموضوع ده اتكتب عن اننا عايزين افكار عشان نرفع من مصر
كنت حكبر دماغى و أقول الناس اللى فاضيه تكتب و فى الأخر مش حيتاخد برأيها
لكن دلوقتى خلاص الواحد حاسس ان البلد بلده بجد
و تستاهل اى مجهود ممكن يبزله عشان خاطرها
لو من شهرين قالوا ان فيه انتخابات رئاسية و ان الرئيس حيسيب الحكم
انا مكنتش حروح انتخب لأنى كنت عارف انها رايحه لعلاء مبارك
بس دلوقتى خلاص انا عارف ان صوتى بقى مسموع و حيأثر فى اللى احنا حنختاره
و بقول احنا المصريين ولاد البلد دى
خلاص من انهارده الكل بقى إيجابى
كفاية اللى شفناه من الشباب لما جهاز الأمن غاب عننا
وقفوا و قالوا احنا فى نقدر نحمى بلدنا من غير الشرطة
تخيلوا ان ناس مجرمين معانا فى الشارع كانت بتقف معانا عشان نحموا بعض ؟!
واحد مجرم زى ده ايه اللى خلاه كده غير البطاله اللى هى كانت من اسباب الفساد
من انهارده خلاص مبقاش فيه فساد ولا محسوبية
كلنا شايفين و عارفين حقنا
و مش حنستخسر حاجه على مصر
و بالنسبة للناس اللى شايفه ان الدنيا كانت لونها وردى زى فيلم مرجان أحمد مرجان
و ان الشرطة كانت بتعمل عيد ميلاد للمسجونين
فياريت ميبصش من الزاوية اللى هو شايفها
و ميختارش الأماكن الراقية اللى مينفعش يبقى فيها فقرا
و يقول ان الدنيا كانت زى الفل و اننا ملناش حق التغيير
بلاش نبقى سلبيين و نرفض التغيير
دايما التغيير فى الاول بيبقى صعب
لكن فى الأخر الشعب هو اللى كسب و ان شاء الله القادم أحسن
أرجو ان محدش يفهمنى غلط
اما بالنسبه للأفكار اللى ممكن نعملها عشان نغير مصر
أكيد أول حاجه اننا فى اى انتخابات قادمة اننا نروح و نختار المناسب لينا
و بلاش نخاف من حد طالما احنا فى الطريق الصح
و كل واحد ينضف ايده و بلاش الرشاوى و المحسوبية
و كل واحد يبدأ بنفسه
بلاش نرمى الزباله فى الشارع
بلاش نكسر الإشارة
لازم نحترم القوانين و مبنقاش مجبرين على كده
بلاش نطبق الربع جنيه و نحطه فى ايد العسكرى عشان ميديناش مخالفه
و بعد كده محدش يسكت لظابط لو قالك بطاقتك فين
قبلها تقوله انت كرنيه اثبات شخصيتك فين و بلاش الخوف و السلبية اللى كانت مسيطرة علينا
و يارب مصر اللى جاية تبقى حلوه بينا ان شاء الله
تقبلوا تحياتى