غيرنا النظام؟!!!!!!
هوه تغيير الحكومة معناه تغيير النظام؟
فعلاً .. أطيب شعب !!
أهديكم جميعاً المقال ده ..
--------------------------------------
واضح
ان الناس معندهاش فكرة
لما بن اليعازر ردا على عدم ترشح مبارك لفترة رئاسية قادمية يقول بالحرف
- دولة اسرائيل ستفتقد الصديق الاكبر لتل ابيب
وتلاقى ناس متعلمة تعليم عالى بتقول ان قطر عاملة علينا مؤامرة وحماس والناس ليهم أجندات اجنبية
يعنى الراجل بتاع اسرائيل بيقول علنى ان مبارك اكبر عميل فى المنطقة لاسرائيل
ودول يقولولك ان هو رمز الامن والسلام والاستقرار والعدالة وهو اللى حامينا من التدخل الاجنبى
هو فعلا حامينا من التدخل الاجنبى .. وفاتحها ع البحرى للتدخل الاسرائيلى
؟؟؟؟
واضح ان القنوات الحكومية عملت شغل عالى اوى اوى
نفس التجييش بتاع ماتش الجزاير بيتكرر ومحدش بيتعلم ابدا
اتكلم مع مين اصلا
ولا اقول ايه
مبارك يقتل تلتمية .. مينزلش عليهم دمعة...
ويعيطو بالدموع عشان خطاب اتكتب بطريقة حلوة وألقاه الرئيس بطريقة مؤثرة بعد مونتاج وكلاكيت سادس وسابع مرة مهو خطاب مسجل بقى .. طب معلش ياريس اضغط على حروف الكلمة دى وانت بتقولها عشان تأثر فى الناس
طب نعمل محاولة تانية ياريس عشان بس الناس تتعاطف معاك
..طب نعدل الجملة دى يمكن نضحك على الناس ونخليها تعيط
وضحكو عليكو فعلا ....
التلتميت شهيد اللى دمهم اتصفى مستشهدوش ودفعوا عمرهم وشبابهم
عشان نحط صور حسنى مبارك بروفايل بيكشر ع الفيس ونعمل جروبات باسم .. اسفين ياريس
يا خسارة دم الشهدا
متستاهلوش
انتو متستاهلوش احسن من حسنى
ومتستاهلوش ظروف احسن تعيشو فيها
فجأة كده بين ليلة وضحاها
فى خلال ست ساعات تتغير مفاهيم مية وتمانين درجة
قناة الجزيرة تبقى بطلة امبارح .. النهاردة بقت عميلة .. المتظاهرون اللى كانوا شهدا امبارح النهاردة خونا .. حسنى اللى كان لازم يرحل .. ده ابونا ولازم يقعد ... الشعب اللى كان بيتحد وخايف على بعضه وعامل لجان شعبية امبارح .. النهاردة بقى بينهب ويكسر ومش حاسين بأى امن بسببه .. ثورة خمسة وعشرين .. عملاء خمسة وعشرين .. هتاف يسقط الرئيس امبارح .. بقى النهاردة ..معاك لحد اما تموت ياريس
الريس فجأة بقى بطل حرب وسلام .. امال مين اللى خلى نص شعبه تحت خط الفقر
وزير الداخلية هو السبب ؟؟ ..طيب .. ومين جاب وزير الداخلية وسابه فى منصبه عشرات السنين
لو كان مبارك يعلم مصايب العادلى فدى مصيبة ولو كان لا يعلم فدى كارثة
مين صدر الغاز لاسرائيل
مين حاصر غزة وجوعها
مين خلانا نتعلم عشرين سنة ونترمى فى الشارع من غير شغل او مأوى
مين خلى كرامتنا متهانة بره وجوه ..
مين خلانا ارخص حاجة ماشية ع الارض ؟؟
الريس صادق .. بأمارة ايه .. ما قال انه هيمسك فترة واحدة بس .. ومسك خمسة
قال امبارح بس انه هيتعهد بحفظ الامن ومن ساعتها وحمام الدم فى التحرير مش بيقف
ولا هو عايز يفض مظاهرة التحرير بأى طريقة حتى لو هيحرقهم بقنابل مولوتوف ؟.
الريس قال انه هيمشى وعين نائب ؟؟ .. ومين اللى دفعه لكده مش التلتمية اللى استشهدوا اللى بتقولوا عليهم عيال سيس ..
عايز يعمل حوار وطنى .. منت بقالك تلاتين سنة بتسمع صوت نفسك .. مين اللى دفعه لكده .. مش التلتمية اللى استشهدو ؟
الريس مش عايز يهرب وصامد وخايف على مصر وبيستأسد عشان يحمى البلد ..
والله هو لو تنحى دلوقتى .. هيتقدم لمحاكمة عسكرية ده اولا
ثانيا هو لو عايز يحمى البلد زى ما قال امبارح .. ليه خلى البلطجية بالاسلحة النهاردة يعملوا عملية ابادة منظمة وقتل منهجى للمتظاهرين العزل
المتظاهرين البواسل اللى بقالهم اسبوع مفيش منهم شكوى معاكسة بنت حتى
ليه وزير داخليته الجديد بيستغل جشع وفقر الناس وبيديهم فلوس عشان يتظاهرو تأييدا للريس وبيجبر البلطجية على طحن اى واحد بيرفض مبارك
هو ده وزير الداخلية الجديد ؟؟ بلطجى جديد ؟؟ هو ده مبارك اللى خايف على امن مصر
جايبلنا رئيس مصلحة السجون اللى كان بيعذب الناس بدون اى وجه حق ولا اى سند قانونى
هو ده الاب ؟؟
وبعدين فين الاب اللى شاف دم الف من ولاده اللى غرقوا فى العبارة .. وساب المسئل عن ده يهرب لندن ...وبعدها اتريق عليهم لما قال فى لقاء تليفزيونى بلهجة تهكم .. عبارة من اللى بيغرقوا دول هى هى ..
ونعم الاب فعلا
فين الاب اللى ساب الفساد يجرى فى الناس من اصغر موظف لاكبر مسئول
الفساداللى ظهر فى اروع صورة النهاردة لما امين الشرطة يدى ميت جنيه لبلطجى عشان يتظاهر تأييدا لمبارك
الاب الكذاب اللى فى كل مناسبة يقولك .. انا هحكم مصر لاخر دقيقة فى عمرى
وامبارح يقولك فى الخطاب انا اصلا لم اكن انتوى الترشح لفترة رئاسة جديدة ..
أصدقه ازاى لما يقول انه مش هيترشح تانى .. وهو بيكذب دايما ؟؟
وبعدين مصر هيحصلها ايه لو مشى .. افرضو انه مات مثلا ..
خلاص متنا احنا كمان ؟؟؟
هو فيه ايه
يا خسارة دم الشهدا
ياخسارة دم الشهدا
ياخسارة دم الشهدا
والله دمهم خسارة فينا
ولكل راجل صامد فى التحرير
مصر مش مستاهلة كل التعب ده
انت حقك تعيش فى بلد ارقى واحسن مع شعب بيفهم
مفيش فايدة
مفيش فايدة